អឺរ៉ុប៖ ក្រុមហ៊ុនផលិតវ៉ាក់សាំង Pfizer Inc. និង Moderna Inc. បានបង្កើនតម្លៃលក់ចេញប្រភេទវ៉ាក់សាំងបង្ការកូវីដ-១៩របស់ខ្លួន ក្នុងកិច្ចសន្យាផ្គត់ផ្គង់ជាមួយបណ្តាប្រទេសនៅក្នុងតំបន់អឺរ៉ុបនានា។ នេះបើតាមការរាយការណ៍ពីសារព័ត៌មានដ៏ល្បីល្បាញផ្នែកហិរញ្ញវត្ថុ The Financial Time។

តម្លៃសម្រាប់ការផ្គត់ផ្គង់ថ្មីមានការកើនឡើងដល់ ១៩,៥០អឺរ៉ូ (២៣,១៥ដុល្លារអាមរិក) ក្នុងមួយដូស សម្រាប់វ៉ាក់សាំងប្រភេទ Pfizer ខណៈតម្លៃចាស់សម្រាប់ការផ្គត់ផ្គង់ត្រឹមតែ ១៥,៥០អឺរ៉ូប៉ុណ្ណោះក្នុងមួយដូស។

មិនខុសគ្នាពី Pfizer ឡើយ វ៉ាក់សាំងប្រភេទ Moderna ក៏មានការកើនឡើងខ្ពស់ផងដែរ ត្បិតតម្លៃចាស់សម្រាប់ការផ្គត់ផ្គង់ទៅកាន់សហភាពអឺរ៉ុបត្រឹមតែជិត ២៣ដុល្លារអាមេរិកប៉ុណ្ណោះក្នុងមួយដូស ប៉ុន្តែក្នុងកិច្ចសន្យាផ្គត់ផ្គង់ថ្មីបានកើនឡើងដល់តម្លៃ ២៥,៥០ដុល្លារក្នុងមួយដូសឯណោះ។ យ៉ាងណាក្តី តម្លៃនេះក៏មានការថយចុះបន្តិចដែរ បើប្រៀបធៀបនឹងតម្លៃនៃកិច្ចសន្យាដំបូងចំនួន ២៨,៥០ដុល្លារអាមេរិក្នុងមួយដូស តែបានចរចានៅសល់ត្រឹម ២៥,៥០ដុល្លារក្នុងមួយដូស ក្រោយការបញ្ជាទិញពីសហភាពអឺរ៉ុបមានការកើនឡើង។

តំណាងក្រុមហ៊ុនទាំងពីរ Pfizer និង Moderna មិនមានការបកស្រាយណាមួយជាផ្លូវការឡើយជុំវិញការតម្លើងថ្លៃវ៉ាក់សាំងរបស់ខ្លួនក្នុងកិច្ចសន្យាផ្គត់ផ្គង់ជាមួយសហភាពអឹរ៉ុបនេះ។

ជាមួយការបញ្ជាទិញមានការកើនឡើងខ្ពស់នេះ តំណាងសហភាពអឺរ៉ុបានឱ្យដឹងថា ប្រជាជនពេញវ័យក្នុងតំបន់អឺរ៉ុបចំនួន ៧០ភាគរយ គឺជាគោលដៅក្នុងការផ្តល់វ៉ាក់សាំងឱ្យបានរួចរាល់ត្រឹមដំណាច់រដូវក្តៅនេះ៕